من طفلة تخاف.. إلى امرأة ما تعرف معنى الخوف

كنت زمان طفلة تخاف من كل شي.. من الظلام، من الكلام، من عيون الناس، وحتى من أبسط المواقف. كنت أحس إني ضعيفة، وإن أي شيء ممكن يجرحني أو يهزني. يمكن لأني كنت أشوف الحياة ببراءة زايدة، وأصدق إن الدنيا مكان آمن.

بس مع الوقت، ومع كل التجارب اللي مرّيت فيها.. تعلمت.
تجارب ما كانت سهلة، بالعكس.. تعيسة لدرجة إنها كسرتني أكثر من مرة. خسرت ناس كنت أحسبهم أقرب لي، انجرحت من ناس عطيتهم ثقتي، وانحطيت في مواقف ما تمنيت حتى أعيشها.

كل تجربة كانت مثل صفعة.. توجع، تبكيني، تخلي قلبي يتشقق. بس في نفس الوقت، كل صفعة كانت تصقلني وتعلّمني. شوي شوي اكتشفت إني لازم أوقف، لازم أكون قوية، لأن الضعف ما يحمي ولا ينفع.

اليوم.. ما صرت الطفلة اللي تخاف. صرت امرأة تعرف إن الخوف ما له مكان في حياتها. مو لأني ما أتألم.. بالعكس، أتألم وأتعب، بس ما عاد أسمح للألم يكسّرني. صرت أعرف كيف أواجه، كيف أقول "لا"، وكيف أختار طريقي حتى لو كان صعب.

كل جرح مرّ علي، صار علامة فيني.. بس العلامات هذي ما خلتني أبشع، بالعكس، خلتني أقوى وأوضح.
اليوم إذا واجهتني مشكلة؟ أبتسم وأقول: "مو أول مرة أتعلم من الوجع".

أنا مو نفس الطفلة القديمة، أنا امرأة كبرت وتعلمت، وصار عندي دروس من الحياة ما تقدر تهزّها أي عاصفة.